Psa 99 | TUCT | STEP | Yoova, i kinik tiina tau iŋgin gabua naol isov. Yam nughmariŋ asov aroi pani ve tinimim irur. I ileep ila niia to ghamuuŋ pooz tau igheen izala aŋela ariaŋazi avarazi na. Tapiri igham taan irur ve ilala ilamlam imin yogyoog itoktok.

bIs 11:2-5

cIgham 4:15; 1Sam 7:9

dIgham 19:9, 33:9

eIgham 34:6+

Psalms 99

Maaron, i kinik patabuyaaŋ

1 Yoova, i kinik tiina tau iŋgin gabua naol isov.
Yam nughmariŋ asov aroi pani ve tinimim irur.
I ileep ila niia to ghamuuŋ pooz tau igheen izala aŋela ariaŋazi avarazi na. ^{▼▼(99:1) Aŋela ariaŋazi tane, tiwaat zi tighe ‘cherubim.’ Tapirizi ve ŋgar toozi, ene tiina kat, ve yes irau tila tilam rekrekia mon. Ezekiel ŋgat 1 ipaghazoŋai ghiit pazi ighe Maaron niia to ghamuuŋ pooz iyooz izala avarazi. Yes Israela tipayooz cherubim anunuzi ru izala bokis to saveeŋ mbuaaŋ paavo. Pasaa, tighita tighe bokis tawe imin Yoova niia to ghamuuŋ pooz.}
Tapiri igham taan irur ve ilala ilamlam imin yogyoog itoktok.

2 Yoova ilepleep izi nugh tooni Zion. Eeza tomania tapiri, ene tiina kat.
Nughmariŋ tisov tileep ila i saamba.
3 Yoova, yo ezam tiina, ve tapirim paam, tiina kat. Ve yo patabuyaaŋ.
Tauta tamtamon tisov aat tiroi payo ve tipait ezam.

4 Yo kinik saksakim ve ariaŋam, ve lolom pa ŋgar duduuŋa kat.
Yo ta umin puughu pa ŋgar duduuŋa.
Yo upapalot ŋgar duduuŋa, le igheen ariaaŋ ila yes Israela sosozi, ve uluul zi pa pataŋani toozi. ^b
5 Tapait Yoova, i Maaron toit.
Tala taput agheen ila niia to ghamuuŋ pooz naagho ve tapakuru.
Pa i patabuyaaŋ.
6 Muuŋ, Mose gha Aron timin zeran to watooŋrau.
Yes tau titaŋ rarai Maaron pa uleeŋ na, propet Samuel, i toozi ee paam.
Ve Yoova ilooŋ suŋuuŋ toozi, ve iuul yes Israela. ^c

7 Saawe tau yes Israela tilaghlaagh izi nugh ŋginaaŋa, Yoova ileep ila taitai loolo, ve isavsaav pazi.
I ighur tutuuŋ pazi, leso yesŋa tivalupu zi timin eemon.
Ve matazi kisin tutuuŋ tawe tomania tutuuŋ siriv tau i igham pazi na, ve titaghon zi. ^d
8 Yoova, yo Maaron tsiei. Yo uloŋlooŋ suŋuuŋ to tamtamon tsio, ve upulpul sosor toozi.
Eemon ughurghur atuya pa sosor toozi paam. ^e
9 Tapait Yoova, i Maaron toit.
Taput agheen pani izi loloz tooni patabuyaaŋ, ve tapakuru.
Pasaa, Maaron toit Yoova, i patabuyaaŋ.